Adani Group : અદાણી ગ્રૂપને લગતા એક મોટા સમાચાર સામે આવ્યા છે. ગ્રૂપની મુખ્ય કંપની અદાણી એન્ટરપ્રાઇઝે રેલવે ટિકિટ બુકિંગ કંપની સ્ટાર્ટ એન્ટરપ્રાઇઝ પ્રાઇવેટ લિમિટેડ (SEPL)માં લગભગ 30 ટકા હિસ્સો હસ્તગત કર્યો છે. SEPL એ ટ્રેનમેનનું ઓપરેટર છે, જે ઓનલાઈન રેલવે ટિકિટ બુકિંગ પ્લેટફોર્મ છે. SEPLએ નાણાકીય વર્ષ 2022-23માં રૂ. 4.51 કરોડનું ટર્નઓવર હાંસલ કર્યું હતું.
અદાણી એન્ટરપ્રાઇઝે ગયા મહિને SEPLમાં સમગ્ર હિસ્સો ખરીદવા માટે કરારની જાહેરાત કરી હતી. અદાણી એન્ટરપ્રાઇઝે શનિવારે શેરબજારને આપેલી નોટિસમાં જણાવ્યું હતું કે, કંપનીની સંપૂર્ણ માલિકીની પેટાકંપની અદાણી ડિજિટલ લેબ્સ પ્રાઇવેટ લિમિટેડે રૂ. 3.56 કરોડમાં 29.81 ટકા હિસ્સો ખરીદ્યો છે.
કોંગ્રેસ પાર્ટીનો આરોપ
જ્યારે અદાણી એન્ટરપ્રાઇઝે ગયા મહિને SEPL નો ઉલ્લેખ “ઓનલાઈન ટ્રેન બુકિંગ અને માહિતી પ્લેટફોર્મ” તરીકે કર્યો હતો, ત્યારે શનિવારે તેણે તેને “ઈ-કોમર્સ અને વેબસાઈટ ડેવલપમેન્ટ” કંપની તરીકે વર્ણવ્યું હતું. ગત મહિને કોંગ્રેસે અદાણી ગ્રૂપના રેલ ટિકિટ બિઝનેસમાં જોડાવાની જાહેરાત પર આકરી પ્રતિક્રિયા આપી હતી. પાર્ટીના જનરલ સેક્રેટરી જયરામ રમેશે કહ્યું હતું કે અદાણી દ્વારા ટ્રેનમેન પ્લેટફોર્મનું સંપાદન આખરે ભારતીય રેલ્વેની ટિકિટિંગ શાખા IRCTCના સંપાદન માટે માર્ગ મોકળો કરી શકે છે.
IRCTC એ નકારી કાઢ્યું
આનું ખંડન કરતાં, ઇન્ડિયન રેલ્વે કેટરિંગ એન્ડ ટુરિઝમ કોર્પોરેશન (IRCTC) એ કહ્યું હતું કે ભારતીય રેલ્વેમાં દરરોજ લગભગ 14.5 લાખ આરક્ષિત ટિકિટ બુક થાય છે. આમાંની લગભગ 81 ટકા ટિકિટો ઓનલાઈન બુક કરવામાં આવી છે અને માત્ર IRCTC દ્વારા જ બુક કરવામાં આવી છે. આ સ્થિતિમાં IRCTC અને ટ્રેનમેન જેવા તેના એજન્ટો વચ્ચે કોઈ સ્પર્ધા નથી. IRCTCના ટિકિટિંગ પાર્ટનર ટ્રેનમેનનો કુલ આરક્ષિત ટિકિટમાં 0.13 ટકા હિસ્સો છે.
